Vighna Haran by Acharya Jeetmal @ HereNow4U

Title..Vighna Haran

Author...Acharya Jeetmal

Performed by..Babita Gunecha

🎻 *विघ्नहरण की ढाल* (पंचऋषि स्तवन)

https://youtu.be/f_z9b6rswgY

📯📯📯📯

अ.भी. रा.शि. को. उदारी हो,

धर्ममूर्ति धुन धारी हो,

विघ्नहरण वृद्धिकारी हो,

सुख संपति दातारी हो।

भजो मुनि गुणां रा भंडारी हो।।

१~भिक्षु भारीमाल ऋषिराय जी

खेतसी जी सुखकारी हो,

हेम हजारी आदि दे

सकल संत सुविचारी हो।

प्रणमूं हर्ष अपारी हो।।

२~दीपगणी दीपक जिसा,

जयजश करण उदारी हो,

धर्म-प्रभावक महाधुनी

ज्ञान गुणां रा भंडारी हो।

नित प्रणमै नर नारी हो।।

३~सखर सुधारस सारसी,

वाणी सरस विशाली हो,

शीतल चंद सुहावणो,

निमल विमल गुण न्हाली हो।

अमीचंद अघ टाली हो।।

४~उष्ण शीत वर्षा ऋतु समै,

वर करणी विस्तारी हो,

तप जप कर तन तावियो,

ध्यान अभिग्रह धारी हो।

सुणतां इचरजकारी हो।।

५~संत धनो आगे सुण्यो,

ए प्रगट्यो इण आरी हो,

प्रत्यक्ष उद्योत कियो भलो,

जाणे जिन जयकारी हो।

ज्यांरी हूँ बलिहारी हो।।

६~धोरी जिनशासन घुरा,

अहोनिशी में अधिकारी हो,

परम दृष्टि में परखियो,

जबर विचारण थांरी हो।

सुजस दिशा अनुसारी हो,

प्रगट्यो ऋषि तूं भारी हो।।

७~वृद्ध सहोदर जीत नों,

जस धारी जय कारी हो,

लघु सहोदर स्वरूप नों,

भीम गुणां रो भंडारी हो।

सखर सुजस संसारी हो।।

८~समरण थी सुख संपजै,

जाप जप्यां जस भारी हो,

मन वांछित मनोरथ फलै,

भजन करो नर-नारी हो।

वारूं बुद्धि विस्तारी हो।।

९~रामसुख रलियामणो,

तेसठ उदक आगारी हो,

अड़सठ पैतालिस भला,

बलि उगणीसै चौविहारी हो।

बड़ तपसी तपधारी हो।।

१०~मन दृढ़ वच दृढ़ महामुनि,

शील दृढ़ सुविचारी हो,

परम विनीत पिछाणियो,

श्रद्धा दृढ़ सुधारी हो।

समरण सुखदातारी हो।।

११~शिव वासी लावा तणो,

तप गुण राशी उदारी हो,

अश्वासी निज आतमा,

षटमासी लग धारी हो।

शीतकाल मझारी हो,

सह्यो शीत अपारी हो।।

१२~उष्ण शिला तथा रेत नीं,

आतापन अधिकारी हो,

तप वर्णन चौमासा तणो

सुणतां इचरजकारी हो।

गुण निप्पन नाम भारी हो।।

१३~कोदर तप करड़ो कियो,

षटमासी लग घारी हो,

ब्यावचियो मुनि बाल हो,

छठ-छठ अठम उदारी हो।

जाव जीव जयकारी हो।।

१४~शीत -उष्ण बहु तप कियो,

सुगुरु थकी इकतारी हो,

परम प्रीत पाली मुनि,

जाझी कीरत ज्यांरी हो।

समरण सुख दातारी हो।।

१५~विघ्न मिटै अरियण हटै,

प्रगटै सुख भारी हो,

दल रूप दोहग दारिद्र दटै

नाम रटै नर-नारी हो।

एहवो भजन उदारी हो।।

१६~कर्म निर्जरा कारणै,

जाप जपो नर- नारी हो,

निरवद्य कारज निरमलो,

शिव सुख नो सहचारी हो।

सावघ आणा वारी हो।।

१७~भीम अमीचंद मुनि भला,

कोदर शिव वृद्धिकारी हो,

रामसुख रलियामणो,

समण पंच सिरदारी हो।

जाप परम जस धारी हो।।

१८~शिव मंगल सुख साहिबी,

संपत सरस सुधारी हो,

अधिक आनंद सुजस भलो,

होवै हरष अपारी हो।

एहवो भजन उदारी हो।।

१९~उदघि अग्नि अरि विष तणो,

सकल विघ्न परिहारी हो,

सत्य -शील प्रभावे जिन कह्यो,

दशमा अंग मझारी हो।

तिमज भजन तंत सारी हो,

परम मंत्र सम धारी हो।।

२०~तस्कर तास न पराभवै,

चर्चा में जयकारी हो,

भूत रोग आपद हरै,

अघ दल रूप परिहारी हो।

समरण महा सुखकारी हो।।

२१~चंद पन्नती सूत्र नीं,

गाथा द्वितीय विचारी हो,

तिमज भजन ए ऋषि तणो,

अधिष्ठायक अधिकारी हो।

थिर दृढ़ आसता थांरी हो।।

२२~दवदन्ती सुरी दीपती,

जयवंती जस धारी हो,

इंद्राणी सूरी आदि दे,

स्हाज करण सुखकारी हो।

पुण्यवंती प्यारी हो।।

२३~गुण ठाणे चौथे गुणी,

समण सत्यां हितकारी हो,

अ.सि.आ.उ.सा.नै सदा,

प्रणमै बारम्बारी हो।

तास विचारणा भारी हो।।

२४~सिंणगारांजी मोटी सती,

हरखूजी हितकारी हो,

माता तास सुंहामणी,

अणसण चरण उदारी हो।

आराघ्यो हितकारी हो।।

२५~हिम्मतवान सती हुंती,

व्यावच करण विचारी हो,

विघ्न हरण बच्छलकरी,

दिल संपत्ति दातारी हो।

जयजश हरष अपारी हो।।

२६~श्री जिन-शासन शोभतो,

अधिष्ठायक अधिकारी हो,

अहोनिशि अवधी प्रजूंझती,

वंछित पूरण हारी हो।

सुख संपत्ति सहचारी हो।।

२७~जाण तिके नर जाणता,

अवर न जाणे लिगारी हो,

धर्म उघोत करण धूरा,

निरवद्य कारज सारी हो।

आणा तास मझारी हो।।

२८~परम प्रीत सद्गुरु थकी विडद,

वहै इकधारी हो,

पूरण आशा आसता,

म्हारा मन मझारी हो।

जबर दिशा जय कारी हो।।

२९~अधिक विनय गुण आगलो,

थिर दृढ आसता धारी हो,

तसु मिटवा जोग उपद्रव मिटै,

ते अघ दल रूप परिहारी हो।

निश्चय री बात न्यारी हो,

न टले होण हारी हो।

जिम जिन अतिशय उदारी हो।।

३०~उगणीसै तेरे समै,

वस्त पंचमी सोमवारी हो,

पंच ऋषि नो परवडो,

स्वतन रच्यो तंत सारी हो।

प्रसिद्ध शहर सिरियारी हो,

गणपति जयजश कारी हो।।

३१~विघ्नहरण नीं स्थापना,

भिक्षु नगर मझारी हो,

महासुदि चवदश पुष दिने,

कीघी हरष अपारी हो।

तास सीख बच धारी हो,

तीरथ च्यार मझारी हो।

ठाणां एकाणूं तिवारी हो।।

लय : *सो ही तेरापंथ पावे*

रचना : *श्रीमद् जयाचार्य*

स्वर : *श्रीमती बबिता गुनेचा, कोयंबटूर*