Acharya Tulsi
सप्तमः प्रकाशः
- कर्मविशुद्धेर्मार्गणापेक्षाणि चतुर्दशजीवस्थानानि ।
- मिथ्यादृष्टि - सास्वादनसम्यग्दृष्टि सम्यग् मिथ्यादृष्टि-विरतसम्यग् दृष्टि-देश- विरत प्रमत्त अप्रमत्तसंयत-निवृत्ति-अनिवृत्तिबादर-सूक्ष्मसम्पराय-उपशान्त-क्षीणमोह-सयोगि-अयोगिकेवलिनः ।
- तत्त्वं मिथ्या श्रद्दधानो मिथ्यादृष्टिः ।
- सम्यक्त्वाच्च्यवमानः सास्वादनसम्यग्दृष्टिः ।
- मिश्रित-सम्यग्मिथ्यारुचिः सम्यग् मिथ्यादृष्टिः ।
- असंयतस्तत्त्वं श्रद्दधानश्च अविरत सम्यग् दृष्टिः ।
- संयताऽसंयतो देशविरतः ।
- प्रमादयुक्तः सर्वविरतः प्रमत्तसंयतः।
- प्रमादवियुक्तो ध्यानलीनः अप्रमत्तसंयतः ।
- निवृत्तियुक्तो बादरकषायो निवृत्तिबादरः ।
- अनिवृत्तियुक्तो बादरकषायः अनिवृत्तिबादरः ।
- उपशमकः क्षपकश्च ।
- सत्संज्वलनसूक्ष्मलोभांशः सूक्ष्मसम्परायः ।
- सर्वथोपशान्त क्षीणकषायौ उपशान्तक्षीणमोहौ ।
- क्षीणघात्यचतुष्टयः प्रवृत्तिमान् सयोगिकेवली ।
- शैलेशीं प्रतिपन्नः अयोगिकेवली ।
- स्थितिरेषामनेकधा ।
- सम्यग् दृष्टि-देशविरत-सर्वविरत- अनन्तवियोजक-दर्शन-मोहक्षपक-उपशमक-उपशान्तमोह-क्षपक-क्षीणमोह-जिनानां क्रमशोऽसंख्येयगुणा निर्जरा ।
- सूक्ष्मसम्परायान्तः साम्परायिको बन्धः ।
- ईर्यापथिको वीतरागस्य ।
- अबन्धोऽयोगी ।
- अकेवली छद्मस्थः ।
- चतुर्दशापि शरीरिणाम् ।
- सुखदुःखानुभवसाधनं शरीरम् ।
- औदारिक-वैक्रिय-आहारक- तैजस-कार्मणानि ।
- उत्तरोत्तरं सूक्ष्माणि पुद्गलपरिमाणतश्चासंख्येयगुणानि ।
- तैजसकार्मणे त्वनन्तगुणे ।
- एते चान्तरालगतावपि ।
- वेदनादिभिरेकीभावेनात्मप्रदेशानां तत इतः प्रक्षेपणं समुद्घातः ।
- वेदना- कषाय-मारणान्तिक-वैक्रिय- आहारक-तैजस-केवलिनः ।
- औपपातिक चरमशरीर- उत्तमपुरुष- असंख्येयवर्षायुषो निरुपक्रमायुषः ।
- शेषाः सोपक्रमायुषोऽपि ।
- अध्यवसान-निमित्त-आहार- वेदना-पराघात-स्पर्श-उच्छ्वास- निःश्वासा उपक्रमकारणानि ।
इति जीवस्थानस्वरूपनिर्णयात्मकः सप्तमः प्रकाशः
